Cinco centros educativos de A Xunqueira beneficiaranse dunha instalación de biomasa

A Consellería de Educación investirá 977.000 euros na instalación de biomasa en varios centros educativos da cidade de Pontevedra. A plataforma Contratos de Galicia publica este xoves a licitación da actuación, da que se beneficiarán dous colexios (o CEIP A Xunqueira número 1 e 2), dous institutos de secundaria (o IES A Xunqueira I e II) e un centro de FP (o CIFP A Xunqueira). Trátase dunha actuación parcialmente financiada con fondos Feder. O obxectivo do departamento da Xunta é iniciar as obras no recinto do CIFP A Xunqueira durante o verán e compatibilizalas durante o curso escolar, sempre baixo as máximas medidas de seguridade. Os traballos teñen un prazo de execución de 6 meses.

A actuación dará resposta á necesidade de substitución do sistema de calefacción existente nestes centros educativos. O novo sistema contará cunha instalación centralizada de produción de enerxía térmica por biomasa para mellorar a eficiencia enerxética dos colexios e institutos. Haberá unha diminución de consumo de combustible polo uso dun recurso renovable autóctono.

Para aloxar as caldeiras de produción térmica con biomasa construirase un pequeno edificio á beira do CIFP A Xunqueira. A razón deste emprazamento, segundo Educación, é que é máis fácil o acceso de camións. O edificio tamén albergará outros equipos necesarios para transportar a enerxía térmica ás salas de caldeiras de cada centro, así como a conexión aos circuítos de distribución existentes. O edificio terá unha superficie total construída de 265,65 metros cadrados e útil de 235,18 metros. Disporá de dous compartimentos no seu interior, un para o almacenamento da biomasa e outro que será empregado como salga de caldeiras e equipos de distribución hidráulica. A cimentación da estrutura realizarase mediante unha laxa de formigón armado de 40 centímetros e a estrutura portante mediante pórticos metálicos.